काठमाडौं । कोभिड १९ संकट व्यवस्थापन समन्वय केन्द्र (सीसीएमसीसी)ले ट्याक्सीबाहेकका सार्वजनिक गाडीमा जोरबिजोर प्रणाली हटाउन सिफारिस गरेको छ ।
जोरबिजोर प्रणालीले सार्वजनिक गाडीमा भिड बढ्दा झनै जोखिम बढेको गुनासोपछि सीसीमएसीसीले जोरबिजोर प्रणाली हटाउन सिफारिस गरेको सीसीएमसीसीकी प्रवक्ता सुनिता नेपालले जानकारी दिइन् । उनकाअनुसार मन्त्रिपरिषद्मा सिफारिस गरिएको हो ।
निजी सवारी साधन र ट्याक्सीमा भने जोरबिजोर कायमै राख्न पनि सिसिएमसीले सिफारिस गरेको छ।सिसिएमसीको सिफारिसमा जिल्लास्तरीय कोभिड व्यवस्थापन समिति (डिसिसिएमसी) ले सवारी साधनको अवरोध खुलाउन सक्ने पनि प्रवक्ता नेपालले जानकारी दिइन्।
सार्वजनिक तथा निजी सवारी साधनमा लागेको जोरबिजोर प्रणालीको सर्वसाधारणले आलोचना गर्दै आएका छन्।
यसैगरी कोभिड १९ संकट व्यवस्थापन समन्वय केन्द्र (सीसीएमसीसी)ले माघ मसान्तसम्म भौतिक रूपमा शैक्षिक क्रियाकलाप नगर्न सिफारिस गरेको छ ।
यसअघि माघ १५ गतेसम्म भौतिक रूपमा शैक्षिक क्रियाकलाप सञ्चालन गर्न रोक लगाइएको थियो ।
तर, जोखिम कायमै रहेकाले माघ मसान्तसम्म भौतिक रूपमा हुने शैक्षिक क्रियाकलापमा रोक लगाउन मन्त्रिपरिषद्लाई सिफारिस गरिएको सीसीएमसीसीकी प्रवक्ता सुनिता नेपालले जानकारी दिइन् ।
यसैगरी सीसीएसीसीले जनस्वास्थ्यका मापदण्ड पालना गरेर रोकिएका परीक्षाहरू चलाउन शिक्षा मन्त्रालयलाई सिफारिस गरेको छ ।
