खानीखोला/बागमती प्रदेश सामाजिक विकास मन्त्रालय र खानीखोला गाउँपालिकाको साझेदारीमा सञ्चालित गृहिणी महिला सशक्तिकरण कार्यक्रम अन्तर्गत उद्यमशिल बनाउन सीपमुलक तालिम प्रदान गरेको छ ।
गृहिणी महिलाहरुलाई घरमा नै बसेर पनि आम्दानीको स्रोत पहिल्याउन सहज बनाउने उद्देश्यले प्रदेश सरकारको सहयोगमा गृहणी महिला सीपमुलक तालिम सम्पन्न गरेको हो । बागमती प्रदेश सरकार सामाजिक विकास मन्त्रालय र खानीखोला गाउँपालिकाको साझेदारीमा सञ्चालित गृहिणी महिला सशक्तिकरण कार्यक्रम अन्तर्गत साबुन र सरफ बनाउने तालिम दिइएको हो । खानीखोला गाउँपालिका वडा नं. ५ र ६ का महिलाहरुलाई लक्षित गरेर साबुन बनाउने तालिम र वडा नं. ४ मा अचार बनाउने तालिम दिएको पालिकाले जनाएको छ । जागरण नेपालकाे आयोजनामा भएको तालिममा वडा नं. ५ र ६ का गरी ५० जना र अचार बनाउने तालिममा वडा नं.- ४ का २५ जना महिलाहरुको सहभागी रहेको थियो ।
तालिमले उद्यमशिल बनाउने भएकाले सिकेको सीपलाई व्यवहारमा उतारेर आफ्नो आयआर्जनमा बृद्धि गर्दै अगाडी बढ्न गाउँपालिका अध्यक्ष थिङले सहभागिहरुलाई आग्रह गर्नुभयो । स्थानीय महिलाहरुको मागको आधारमा आवश्यकता अनुसार स्थानीय उत्पादनमार्फत उद्यमशिल बनाउने उद्धेश्यले साबुन, सरफ र अचार बनाउने तालिमपश्चात महिलामा स्वरोजगारका साथै स्थानीय उत्पादनमार्फत आत्मनिर्भर भएर जीवनमा परिवर्तन ल्याउन सहयोग पुग्ने अपेक्षा गरेको छ ।
प्रमुख प्रशासकीय अधिकृत जीवन गैरेले तालिमले खानीखोलाका महिला तथा कृषक समूहहरुमा उत्साह छाएको बताउनुभयो । स्थानीय उत्पादन र सीपको मुल्याङ्कन गरी सहयोगी निकाय र पालिकाको समन्वय तथा सहकार्यमा उत्पादनशिल कार्यमा पालिका सरकार सधैं साथमा रहने उहाँले बताउनुभयो ।
समापन कार्यक्रममा बोल्दै सामाजिक विकास संयोजक समेत रहनुभएका वडा नं. ४ का अध्यक्ष निशान मोक्तान र पूर्वाधार विकास संयोजक तथा वडा नं. ५ अध्यक्ष बुद्धि बहादुर स्याङ्तानले महिला र युवा जनशक्तिलाई उत्पादनमुलक कार्यमा व्यस्त बनाउने खालको कार्यक्रम निरन्तर सञ्चालन गर्न आवश्यक रहेकोमा जोड दिनुभयो ।
