पनौती/१४ औं नेवाः राष्ट्रिय एकता दिवस शुक्रबार पनौतीमा भव्यताका साथ सम्पन्न भएकाे छ ।
पहिलोपटक उपत्यका बाहिर मनाएको नेवा एकता राष्ट्रिय दिवसकाे र्याली पनौतीको ध्वाखा फ:बाट सांस्कृतिक झाँकी र बाजागाजाबाट सुरू भइ नगरपरिक्रमा पश्चात् लायकु डबलीमा सभामा परिणत भएकाे थियाे ।
नेवाः देय् दबूको संयोजनमा विभिन्न राजनीतिक दल निकट नेवारहरूको जातिय संगठनहरुलाई समेत सहभागीता गराइएको र नेवाः देय् दबू काभ्रे जिल्ला समिति, नेवाः देय् दबू पनौति नगर समिति, हलिं नेवाः गुथि काभ्रे जिल्ला समिति, हलिं नेवाः गुथि पनौति नगर समिति, नवलकचा नवाल समाज, भिन्तुना ग्रुप पनौती लगायत विभिन्न संघसंस्थाहरुको संयुक्त व्यवस्थापनमा भएकाे उक्त कार्यक्रममा बागमती प्रदेश सभा सदस्य कन्चन चन्द्र वादेले नेवाः एकताकाे महत्वलाई बुझेर नेवाःहरू एकजुट भइ नेवाः सभ्यता बचाउनु पर्नेमा जाेड दिए । उहाँले ‘नेवाःहरूकाे भाषा, कला, सभ्यता, संस्कृति, सम्पदा रहिरहे मात्र नेवाःहरूकाे अस्तित्व रहने बताउनुभयो ।
पनौती नगर प्रमुख रामशरण भण्डारीले पनौती नगर विश्व संपदा सुचीमा सुचिकरण गर्ने पहल भइरहेको जानकारी दिनुहुँदै ऐतिहासिक नगर पनौतीमा नेवाः राष्ट्रिय एकता दिवस मनाउनु भइ महत्व दिनुभएकोमा धन्यबाद दिनुभयो।
कार्यक्रमका सभापति नेवाः देय् दबूका केन्द्रीय अध्यक्ष पवित्रमान वज्राचार्यको सभापतित्वमा भएको कार्यक्रममा देय् दबूका केन्द्रीय सदस्य तथा पनौतीका सामाजिक अभियन्ता सुरेश सैंजुले स्वागत मन्तव्य राख्दै नेवाः एकता दिवसकाे औचित्यबारे आफ्नाे धारणा राखेका थिए। सोही अवसरमा उहाँले पनौती नगरको ऐतिहासिक महत्वको बारे चर्चा गर्दै बाह्रवर्षे मकर मेला, भुकम्प नजाने शहरदेखि देव इन्द्रले तपस्या गरेको तपोभूमि जस्ता विषयमा चर्चा गर्नुभयो । नेवाः देय् दबू स्वनिगः विशेष प्रदेशका अध्यक्ष श्रीकृष्ण महर्जनले नेवाः एकता दिवसका विभिन्न पक्षको बारेमा जानकारी दिनुभयो।
नेपाल संवत ११३० पोहेलाथ्व नवमीको दिनमा लाखौं नेवाःहरु दशरथ रंगशालामा भेला भई नेवाः समुदायले जनस्तरवाट नेवाः स्वायत्त राज्य घोषणा गरेको, विविधता भएका नेवाःहरु एकता भएको घोषणा गरेको दिनको सम्झनामा प्रत्येक बर्ष यो दिवस मनाउँदै आएको हो ।
