बनेपा / काभ्रेपलाञ्चोक प्रतिनिधि सभा निर्वाचन क्षेत्र नम्बर–२ की उम्मेदवार बसुन्धरा हुँमागाईको घरदैलो अभियान आज बनेपाको करुणामाई चोकबाट सुरु भई सफलतापूर्वक सम्पन्न भएको छ। अभियानअन्तर्गत बनेपा–१,२ र ३ का विभिन्न गाउँबस्तीमा पुगेर मतदातासँग प्रत्यक्ष भेटघाट तथा संवाद गरिएको थियो।
कार्यक्रमका क्रममा नालाका मतदाताले खानेपानी, सेवा–सुविधा र विकाससम्बन्धी गुनासा राखेका छन्। बनेपा–१ अन्तर्गत पाण्डे गाउँ, लामिछाने गाउँ, बनेपा–२ को घिमिरे गाउँ तथा बनेपा-३ टुसालमा स्थानीयको स्वागतसहित वडा कार्यालय उद्घाटनसमेत गरिएको छ। टुसाललगायतका बस्तीमा उम्मेदवार हुँमागाईको पक्षमा उत्साहपूर्ण वातावरण देखिएको थियो।
अभियानका क्रममा बनेपा -३ का भजन टोलीले उम्मेदवार हुँमागाईको पक्षमा गीत–भजनमार्फत भोट माग्दै प्रचार गरेका थिए। विशेषगरी बनेपा–२ को लामिछाने गाउँमा उल्लेखनीय जनलहर देखिएको थियो। स्थानीयले “हामीलाई पानी खुवाउनेलाई भोट दिने” भन्दै विकास र सेवा दिएको नेतृत्वप्रति समर्थन जनाएका छन्।
स्थानीयका अनुसार पहिले खानेपानीलगायतका विषयमा अभाव र दुविधा रहे पनि अहिले सुविधा र सहजता बढेको छ। त्यसैले विकासलाई सम्झिने र काम गर्ने नेतृत्वलाई साथ दिने प्रतिबद्धता गाउँभरि देखिएको उनीहरूको भनाइ छ।
यसैबीच, भोलि २०८२ साल माघ २४ गते बिहान ८ बजे नगरकोटमा उम्मेदवारसहित पार्टीका कमरेडहरू भेट भई ढाडागाउँ, कार्तिके, हलेदे, चुरिथुम्का हुँदै सिपाघाट पुग्ने कार्यक्रम रहेको छ। दिउँसो खाना पछि गैरिबिसौना, बालुवा पाटी, रानीबन हुँदै नगरकोटमै बास बस्ने कार्यक्रम तय गरिएको सचिवालयले जनाएको छ।
घरदैलो अभियानमार्फत उम्मेदवार हुँमागाईले स्थानीयका समस्या सुन्ने र समाधानका लागि प्रतिबद्ध रहने बताउँदै आएका छन्।
