काठमाडौं/आगामी फागुन २१ गते हुने प्रतिनिधि सभा सदस्य निर्वाचनमा सिन्धुली क्षेत्र नं. २ बाट पत्रकार विक्रम रत्नको नाम उम्मेदवारका रूपमा सिफारिस भएको छ।
नेपाली कम्युनिस्ट पार्टीको सञ्चार–सांस्कृतिक महाशाखा (पार्टी जिल्ला समिति)ले शुक्रबार बसेको बैठकले उनको नाम सर्वसम्मत रूपमा सिफारिस गरेको हो। बैठकको अध्यक्षता महाशाखाका अध्यक्ष बुद्ध लोप्चनले गरेका थिए भने उपत्यका विशेष प्रदेश समितिका उपाध्यक्ष तथा महाशाखा इन्चार्ज निर्मल ज्ञवाली प्रमुख अतिथि रहेका थिए।
कमलामाई नगरपालिका वडा नं. १२ का स्थायी बासिन्दा रत्न डेढ दशकदेखि पत्रकारितामा सक्रिय छन्। उनी २०६९ सालमा सिन्धुलीस्थित रेडियो सिद्धबाबाबाट पत्रकारितामा प्रवेश गरेका थिए र विगत दस वर्षदेखि मुख्यधाराको पत्रकारितामा क्रियाशील छन्। एबीसी टेलिभिजन, न्यूज एजेन्सी नेपाल लगायत आधा दर्जनभन्दा बढी सञ्चारमाध्यममा काम गरेको अनुभव रहेका रत्न हाल सौर्य दैनिक पत्रिकामा आवद्ध छन्।
पत्रकार रत्न प्रेस सेन्टर नेपाल उपत्यका प्रदेश समितिका सचिव तथा नेपाल पत्रकार महासंघ काठमाडौं शाखाका सहसचिव पनि हुन्। पत्रकारितासँगै सामाजिक तथा राजनीतिक क्षेत्रमा सक्रिय र भ्रष्टाचार तथा कुशासनविरुद्ध अभियान सञ्चालन गर्दै आएका उनी आगामी निर्वाचनमा पनि आफ्नो भूमिका निर्वाह गर्न तयार छन्।
उम्मेदवार सिफारिस भएपछि पत्रकार रत्नले भने,
"राजनीतिमा नव–युवापुस्ताको हस्तक्षेपकारी भूमिका आवश्यक भइसकेको छ। त्यसका लागि हामी तयार हुनुपर्ने भएको छ। म सिन्धुली–२ बाट उम्मेदवारी दिन पूर्ण रूपमा तयार छु।"
नेपाली कम्युनिस्ट पार्टीले देशभरबाट विभिन्न क्षेत्रका उम्मेदवारहरू सिफारिस गर्दै आएको छ।
