धुलिखेल/राष्ट्रिय उपभोक्ता मञ्च काभ्रेको परिचयात्मक कार्यक्रम आज धुलिखेलमा सम्पन्न भएको छ । प्रमुख जिल्ला अधिकारी उमेशकुमार ढकालको प्रमुख आतिथ्यता र उपभोक्ताहरूलाई सचेत गराउने उद्देश्यले स्थापना भएको राष्ट्रिय उपभोक्ता मञ्चको जिल्ला कार्यसमितिका पदाधिकारीहरु बीच परिचयात्मक कार्यक्रम भएको हो।
राष्ट्रिय उपभोक्ता मञ्चका केन्द्रिय अध्यक्ष प्रेमलाल महर्जनले उपभोक्ता जागरण बेगर राष्ट्रिय समृद्धि हासिल हुन नसक्ने बताउँदै सरकारले उपभोक्ता हितका निम्ति जागरणमूलक गतिविधिलाई प्राथमिकता दिदै जानुपर्ने खाँचो भएको औंल्याउनु भयो ।उपभोक्ता शिक्षालाई फैलाउन सके मात्र पनि उपभोक्ताहरू थप लाभान्वित बन्न सक्ने उहाँको भनाइ थियो । राष्ट्रिय उपभोक्ता मञ्चका केन्द्रिय अध्यक्ष महर्जनले सरकारले आफ्नो नीतिलाई स्पष्ट र सरल नबनाएसम्म आम उपभोक्ताहरुको दुःख अन्त्य नहुने स्पष्ट पारे ।
प्रमुख जिल्ला अधिकारी उमेशकुमार ढकालले राष्ट्रिय उपभोक्ता मञ्चले गर्ने हरेक कार्यमा जिल्ला प्रशासन कार्यालयको साथ रहने प्रतिबद्धता व्यक्त गरे ।
मञ्चका जिल्ला अध्यक्ष माधव श्रेष्ठको सभापतित्व र सचिव प्रकाश तिमिल्सिनाको सञ्चालनमा भएको वक्ताहरूले उपभोक्ता सचेतना कार्यक्रम आजको आवश्यकता भएको बताउनुभयो ।
