काभ्रेपलाञ्चोक । महाभारत गाउँपालिकाको आयोजनामा प्रमुख जिल्ला अधिकारी तथा सुरक्षा निकायसँग समन्वय र अन्तर्क्रिया कार्यक्रम सम्पन्न भएको छ।
कार्यक्रमको सभापतित्व गाउँपालिका अध्यक्ष कान्छालाल जिम्बाले गर्नुभएको थियो भने उपाध्यक्ष सागर मोक्तानले स्वागत मन्तव्य राख्नुभएको थियो। अध्यक्ष जिम्बाले महाभारत गाउँपालिकाको समग्र अवस्था, सेवा प्रवाहमा देखिएका चुनौती तथा नागरिकका समस्याबारे जानकारी गराउनुभएको थियो।
कार्यक्रममा काभ्रेपलाञ्चोकका प्रमुख जिल्ला अधिकारी गोपालकुमार अधिकारीले राष्ट्रिय परिचयपत्रका कारण जेष्ठ नागरिकले भोग्नुपरेका समस्याको समाधानका लागि एक हप्तासम्म कर्मचारी खटाइने जानकारी दिनुभयो। साथै, बाबुको ठेगाना नहुँदा जन्मदर्ता गर्नुपर्ने समस्या, श्रीमान छोडेर अर्कोसँग विवाह गरेका महिलालाई अविवाहित प्रमाणित गर्नुपर्ने जस्ता जटिल विषयहरूबारे वडाध्यक्षहरूले उठाएका जिज्ञासामा प्रजिअ अधिकारीले प्रष्ट पार्नुभएको थियो।
अन्तर्क्रियामा वडा अध्यक्ष रमेश लुंगेली, कान्छामान जिम्बालगायतले स्थानीय तहमा देखिएका प्रशासनिक तथा कानुनी समस्याबारे जिज्ञासा राख्नुभएको थियो।
सोही क्रममा प्रमुख जिल्ला अधिकारी अधिकारीले गोकुले माध्यमिक विद्यालयस्थित मतदान केन्द्रको अनुगमन गर्नुका साथै इलाका प्रहरी कार्यालय र इलाका प्रशासन कार्यालयको समेत अनुगमन गर्दै आवश्यक निर्देशन दिनुभएको छ।
