गणेश आचार्य/ धुलिखेल
कृषि ज्ञान केन्द्र काभ्रेपलान्चोक बाग्मती प्रदेशले जिल्ला स्तरिय उत्कृष्ट ६ जना कृषकहरुलाई पौष २६ गते बुधबार एक कार्यक्रमका वीच पुरस्कार वितरण गरेको छ।
बिगत लामो समयदेखि निरन्तर कृषि क्षेत्रमा गरेको कडा मिहेनत र योगदानको उच्च मुल्यांकन गर्दै उत्कृष्ट ६ जना कृषकलाइ जनही नगद १५,००० सहित सम्मान पत्र प्रदान गरिएको थियो। सम्मानित हुनेमा काभ्रेको पनौती नगरपालिका वडा नम्बर २ का रमेश आचार्य, वडा नम्बर ७ का देवकृष्ण मानन्धर, वडा नम्बर ८ का रविन्द्र बन्जारा, सिन्धुपाल्चोकको मेलम्ची नगरपालिका वडा नम्बर १ का झलक प्रसाद सुवेदी, श्रीकृष्ण धिमाल र लिशंखुपाखर वडा नम्बर ४ का दिउ कुमारी शाक्य रहेका छन।
कृषि ज्ञान केन्द्र काभ्रेले उत्कृष्ट कृषक छनौटका लागि मापदण्ड तोकेर खुल्ला निवेदन माग गरेको थियो । सोहि मापदण्डका आधारमा काभ्रेपलाञ्चोकबाट ४४ वटा र सिन्धुपाल्चोकबाट १३ गरी ५७ वटा आवेदन परेका थिए ।
मापदण्डमा तोकिए अनुसार प्राप्ताङ्कका आधारमा उत्कृष्ट ६ जना सम्मानित भएका कृषि ज्ञान केन्द्र काभ्रेका प्रमुख तेजप्रसाद दवाडीले जानकारी दिनुभयो ।
जिल्ला समन्वय समिति काभ्रेका दिपक गौतमको प्रमुख आतिथ्यताम भएको उक्त कार्यक्रममा कृषि ज्ञान केन्द्र काभ्रेका प्रमुख तेज प्रसाद दवाडी, कृषि प्रसार अधिकृत उमा श्रेष्ठ भेटेरिनरी अस्पताल तथा पशु सेवा बिज्ञ केन्द्रका प्रमुख राजकुमार हुमागाइ लागायतले कार्यक्रमका बारेमा बोल्दै मिहेनती कृसकहरुलाइ हौसलास्वरुप यो कार्यक्रम निरन्तर रहने बताए।
