बनेपा/नेपाल आदिवासी जनजाति पत्रकार महासंघ (फोनिज) काभ्रेले नेपाल पत्रकार महासंघ काभ्रेका अध्यक्ष बद्रीराज तिमल्सिना मार्फत सात दिने अल्टिमेटमसहित स्मरणपत्र बुझाएको छ । “सत्यनारायण बहादुर श्रेष्ठलाई नेपाल पत्रकार महासंघको संस्थापक अध्यक्ष कायम गर” भन्ने नेपाल आदिवासी जनजाति पत्रकार महासंघ फोनिजको देशैभर आन्दोलनको सर्कुलर कार्यक्रम अन्तर्गत मंगलबार जिल्ला अध्यक्षलाई जिल्ला मार्फत केन्द्रलाई स्मरणपत्र बुझाइएको हो ।
तथ्य र प्रमाणको आधारमा नेपाल पत्रकार महासंघ तत्कालिन नेपाल पत्रकार संघको संस्थापक अध्यक्ष कायम गर्न २०७९ सालमा सम्पुर्ण समितिबाट माग गरिएको थियो । तर, गलत इतिहास सच्याएर अग्रजको योगदानलाई सम्मान गर्न महासंघ तयार नभएकोले महासंघको नीतिविरुद्ध फोनिज निर्णायक आन्दोलनको चरणमा पुगेको स्मरणपत्रमा उल्लेख गरिएको छ ।
७ दिनभित्र सत्यनारायण बहादुर श्रेष्ठलाई नेपाल पत्रकार महासंघको संस्थापक अध्यक्ष कायम नभए महासंघको केन्द्रिय कार्यालय सहित देशैैभरका कार्यालयहरुमा तालाबन्दी गरिने फोनिजले जनाएको छ ।
पत्र बुझ्दै नेपाल पत्रकार महासंघ काभ्रेका अध्यक्ष बद्रीराज तिमल्सिनाले तत्काल फोनिजको स्मरणपत्रलाई केन्द्रीय कार्यालयमा यथाशीघ्र पठाउने बताए । तिमल्सिनाले फोनिजको मुद्धालाई सम्बोधन गर्न सहज वातावरण तयार गर्ने प्रतिबद्धता व्यक्त गरे । अल्टिमेटम पत्र बुझाउन फोनिज काभ्रे अध्यक्ष इन्द्र बहादुर थापा, फोनिज बागमती प्रदेश ईन्चार्ज पेमा लामा लगायत फोनिजकर्मीहरुको उपस्थिति रहेको थियो ।
