काठमाडौं। नेपाल कम्युनिस्ट पार्टी (नेकपा) का महासचिव नेत्रविक्रम चन्द ‘विप्लव’ले जेन–जी आन्दोलनले उठाएका माग पूरा नभएको भन्दै तत्काल सर्वपक्षीय अन्तरिम सरकार गठन गर्नुपर्ने र भ्रष्टाचार नियन्त्रणका लागि पाँच सय र एक हजार दरका नोट बन्द गर्नुपर्ने माग गरेका छन्।
राजधानीमा आयोजित पत्रकार सम्मेलनमा महासचिव विप्लवले हालको अन्तरिम सरकार जनआन्दोलन र जेन–जी आन्दोलनको उद्देश्यअनुसार नभएको बताए। उनका अनुसार प्रधानमन्त्री र मन्त्री कसरी नियुक्त भए भन्ने स्पष्ट नभएकाले देश फेरि अस्थिरताको दिशातर्फ धकेलिएको छ।
उनले भने, “देशमा कालोधन, माफिया र दलालको आतंक बढिरहेको छ। पाँच सय र एक हजार नोट खारेज गरेर नयाँ दरका नोट जारी गर्नु आवश्यक छ। यसले अर्थतन्त्रलाई स्वच्छ बनाउँछ र भ्रष्टाचार नियन्त्रण गर्न मद्दत गर्छ।”
बैठकले उत्पादन र कृषि क्षेत्रलाई सुदृढ बनाउन ‘एकीकृत स्वामित्व’ अन्तर्गत उद्योग सञ्चालन गर्ने निर्णय पनि गरेको छ। महासचिव विप्लवले नयाँ कम्युनिस्ट केन्द्र निर्माण गरी नयाँ पुस्तालाई जिम्मेवारी दिनुपर्ने र पुराना नेताहरूले मार्गदर्शन गर्नुपर्ने कुरा पनि औंल्याए।
विप्लवले राज्यसत्तामा रहेका नेताहरूको सम्पत्ति छानबिनका लागि आयोग गठन र कालोधन नियन्त्रणका लागि ठोस कदम चाल्न सरकारसँग आग्रह गरे। उनले जेन–जी आन्दोलनको बलिदान र जनसांस्कृतिक समर्थनलाई उचित प्रतिनिधित्व दिने प्रणालीअनुसार नयाँ सर्वपक्षीय सरकार गठन आवश्यक रहेको बताए।
