काभ्रे/पतञ्जली महिला योग समिति काभ्रेले तीज विशेष कार्यक्रम गरेको छ । तीज कार्यक्रममा बोल्ने वक्ताहरुले मौलिकता जगेर्ना गर्नुपर्नेमा जोड दिएका छन् ।
कार्यक्रमका प्रमुख अतिथि बनेपा नगरपालिकाका उपमेयर बिमला सापकोटा दाहालले तीजको मौलिकता जगेर्ना गर्न सबै लाग्नुपर्नेमा जोड दिनुभयो । उपमेयर सापकोटाले तिजलाई दिदीबहिनीको भेटघाटसँगै मौलिकता संरक्षणमा ध्यान दिनुपर्ने बताएकी थिइन् । उहाँले सभ्य र भव्य रूपमा मनाउन आग्रह गर्दै तिज पर्व पहिलेको भन्दा अहिलेको अवस्था फरक भएकाले समय अनुसार बदलिए पनि आफ्ना मौलिकपनमा ध्यान दिन आग्रह गरेकी थिइन् । उहाँले योग अभ्यासद्वारा शारिरिक तथा मानसिक तनावबाट मुक्त हुने भन्दै योगहरु नियमित गर्न आग्रह गर्नुभयो । उहाँले योगले सकारात्मक सोच विकास गर्न सघाउने बताउनुभयो ।
महिला पतञ्जली योग समिति काभ्रेका अध्यक्ष इन्दिरा तौजलेको अध्यक्षतामा भएको कार्यक्रममा पतञ्जली योग समिति बागमति प्रदेशका ग्रोवेन तौजले र जिल्ला अध्यक्ष प्रकाश कायष्थ लगायतले तिज पर्वको शुभकामना दिदै योगले सबै मानिसलाई निरोगी बनाउने भएकाले योगमा ध्यान दिन आग्रह गरेका थिए । कार्यक्रममा स्वागत मन्तव्य राख्नुहुँदै पतञ्जली महिला योग समिति काभ्रेका जिल्ला उपाध्यक्ष कमला राजभण्डारीले योग साधनाको माध्यमबाट स्वास्थ्यसँगै सभ्य समाजका लागि जुट्न आवश्यक रहेको बताएका थिए । कार्यक्रममा तीज गायनसँगै एकल तथा सामुहिक नृत्यहरु प्रस्तुत भएका थिए ।
