काठमाडौं। नेकपा (एकीकृत समाजवादी) निकट पेशागत संगठन संगठन समाजवादी प्रेस संगठनको पहिलो केन्द्रीय अधिवेशन राजधानीमा आजबाट सुरू भएको छ । अर्पण बैंक्वेट बानेश्वरमा जारी अधिवेशनको नेकपा एकीकृत समाजवादीका अध्यक्ष माधवकुमार नेपालले उद्घाटन गरेका छन् ।
उद्घाटन कार्यक्रममा बोल्दै उनले पैसामा लोभिने, जनतालाई पीडा दिने शोषक सामन्त जाली फटाहा पूँजीवादी बढेको र इमान्दार पिल्सिरहनुपर्ने अवस्था आएकाले त्यसलाई परिवर्तन गर्न आवश्यक रहेको बताए । नेपालले संविधानमाथि आँच आउने कुनै पनि क्रियाकलाप भए त्यसका विरुद्ध कलम चलाउन अनुरोध गर्दै उनले कुनै आग्रह पूर्वाग्रह नराखी संविधानको रक्षा गर्ने गरी काम गर्न पत्रकारहरुलाई निर्देशन दिए ।
कार्यक्रममा नेकपा एकीकृत समाजवादी केन्द्रीय उपमहासचिव तथा प्रचार विभाग प्रमुख जगनाथ खतिवडा, मोर्चा संगठन प्रमुख डा.विजय पौडेल, नेपाल पत्रकार महासंघ अध्यक्ष विपुल पोख्रेल लगायतका वक्ताहरुले पत्रकारहरुको समस्या र चुनौतीका बारे आफ्ना विचार राख्नुभयो।
कार्यक्रममा समाजवादी प्रेस संगठनको संस्थापक सदस्य तथा अग्रजहरुलाई सम्मान गरेका थिए।काभ्रेबाट ध्रुवकुमार रायमाझी सम्मानित भएका थिए।
बन्दसत्रमा महासचिव भूपराज खड्काले संगठनात्मक प्रतिवेदन र कोषाध्यक्ष कृष्णराज गौतमले आर्थिक प्रतिवेदन प्रस्तुत गर्नु भएको र हलले सर्वसम्मत पारित गरेको थियो।
यस महाधिवेशनमा देशभरीका ६५ जिल्लाका ४ सय बढी प्रतिनिधिको सहभागिता रहेको संगठनका अध्यक्ष शम्भु श्रेष्ठले बताए ।
