मन्डनदेउपुर/ काभ्रेपलाञ्चोक जिल्लाको मण्डनदेउपुर नगरपालिकाले नयाँ प्रशासनिक भवनबाट सेवा सुरू गर्ने क्रममा सामान ओसार्दा थकाइ लागेपछि एक सूचना प्रकाशित गरी सार्वजनिक बिदा दिएको छ ।
मण्डनदेउपुर नगरपालिकाले नयाँ प्रशासनिक भवनबाट सेवा सुरू भएको र कार्यालयमा सामान ओसार्दा कर्मचारी तथा जनप्रतिनिधिहरू थकित भएका कारण बिहीबार सार्वजनिक बिदा दिएको सूचना प्रकाशन गरेको हो । त्यस सूचनाबारे यतिबेला सामाजिक सञ्जालमा विभिन्न टिप्पणी भइरहेको छ ।
नगरपालिकाले बुधबार जारी गरेको सूचनामा भनिएको छ–यस कार्यालयको मिति २०८०÷६÷३ को निर्णय अनुसार ९औं संविधान दिवसको अवसरमा नगरपालिकाको नव निर्मित भवनबाट सेवा प्रवाह भएको हर्षोल्लासको उपलक्ष्यमा तथा सो क्रममा विगत ३ दिनदेखि लगातार व्यवस्थापन गर्ने कार्यमा खटिंदा सम्पूर्ण कर्मचारी तथा जनप्रतिनिधिहरु थकित भएका कारण मिति २०८०÷६÷४ गतेका दिन नगरपालिकाको कार्यालय यस अन्र्तगतका कार्यालयहरु, विद्यालय लगायत सम्पूर्ण सरकारी तथा गैरसरकारी संस्थाहरुलाई विदा दिईएको व्यहोरा सबैका लागि जानकारीका लागि यो सूचना प्रकाशन गरिएको छ ।
सो सूचनालाई कतिपयले ‘थकाइ बिदा’ दिनु नगरपालिकाको काम, कर्तव्य अधिकारको दुरूपयोग समेतको रूपमा अथ्र्याएका छन् । नगरप्रमुख टोकबहादुर वाइवाले थकाइ बिदा नभइ व्यवस्थापनका लागि बिदा दिनु परेको बताए । ‘संविधान दिवसको अवसर पारेर हामीले नगरपालिकाको नयाँ कार्यालयबाट सेवा सुरू गरेका छौं । पुरानो कार्यालय तीन किलोमिटर पर थियो, नगरप्रमुख वाइवाले भने, ‘तीन दिन लगाएर सामान सार्दा व्यवस्थापन गर्न भ्याइएको छैन । त्यसैले बिदा दिएको हो।’
सामान व्यवस्थापनका अतिरिक्त प्राविधिक कुराहरू पनि मिलाउनुपर्ने भएकाले बिहीबार सार्वजनिक बिदा दिइको उपप्रमुख विष्णुमणि नेपालले जानकारी दिए। ‘भुलवश थकाइ बिदा हुन गएको हो। हामीले सट्टा बिदा दिएका हौं। सारिएका सामानहरू मिलाउनै बाँकी रहेकाले पनि सेवा दिन असहज भयो,’ उपप्रमुख नेपालले भने ।
मण्डनदेउपुर नगरपालिकाले १६ करोडको लागतमा नयाँ प्रशासनिक भवन बनाएको हो।
