बनेपा/प्रतिभा सम्मान प्रवन्ध गुठीले विभिन्न विधामा योगदान गर्ने नौ जना व्यक्तिहरूलाई सम्मान गरेको छ।
प्रतिभा सम्मान प्रवन्ध गुठीले शनिवार बनेपामा आयोजना कार्यक्रममा पत्रकारहरुमा भोला थापा, मोतीराम तिमल्सिना, दिपक सापकोटा, साहित्यकारहरु यादव खरेल, सुर्यप्रसाद लाकोजु र रत्नप्रसाद अनामणी, उद्यमी महिलाहरुमा कमला लामा, निरु बैदार र ज्योत्सना सैंजु सम्मानित हुनुभएको छ। गुठीका अध्यक्ष मोहन दुवाल को अध्यक्षता भएको कार्यक्रममा नेपाल प्रज्ञाप्रतिष्ठानका कुलपति भूपाल राईले सम्मान गरेका हुन् ।
पुरस्कार छनौट समितिले एक महिना अघि २०७७, २०७८ र २०७९ सालका उत्कृष्ट ब्यक्तिहरु छनौट गरी सम्मान गर्ने निर्णय गरेको थियो । कोभिड संक्रमणका कारण सोही वर्षदेखि पुरस्कार वितरण गर्ने कार्य रोकिएको अध्यक्ष मोहन दुवालले बताए । हरेक वर्ष प्रतिभा छनौट गरी सम्मान गर्ने कार्यक्रम अर्न्तगत रोकिएका अघिल्ला दुई वर्षका प्रतिभा सहित तीन वर्षको सम्मान एकै पटक गरिएको बताइयो । सम्मानित हुनेहरुलाई नगद १५ हजार, दोसल्ला सहित प्रमाणपत्रद्वारा सम्मान गरिएको हो ।
सम्मान कार्यक्रममा बोल्दै नेपाल प्रज्ञाप्रतिष्ठानका कुलपति भूपाल राईले काभ्रे जिल्ला प्रतिभा जन्माउने जिल्लाका रुपमा चिनिएको बताउँदै राष्ट्रलाई, समुदायलाई यस्ता प्रतिभाहरुको आवश्यक रहेको बताए । ‘प्रतिभा सम्मान प्रवन्ध गुठी जस्तै संस्था आवश्यक छन् । राज्यले यस्ता प्रतिभाहरुको सम्मान गर्दैन । यस्ता संस्थाले परिचालन र जागरुक गराउँछ’–कुलपति राईले भने–‘राज्यले प्रतिभाहरुलाई सम्मान गर्दैन । शासन मात्रै गर्छ । राज्यले प्रतिभा चिन्दैन । दलका नेताहरु मन्त्री, सांसद र नियुक्ति दिलाउन मात्रै सक्रिय छन् ।’ काभ्रेपलाञ्चोक जिल्लाको बनेपामा स्थापित उक्त संस्था मार्फत जिल्लामा पहिलो पटक उपस्थित हुन पाएकोमा खुशी ब्यक्त गर्दै कुलपति राईले सम्मानित प्रतिभाहरुलाई बधाई दिए ।
