शनिबार राति प्राइम टाइम टेलिभिजनसँगको संवादका क्रममा नेकपा माओवादी केन्द्रका अध्यक्ष पुष्पकमल दाहाल प्रचण्डले अमेरिकी सहायता परियोजना एमसीसी फिर्ता पठाउनुपर्ने पक्षमा आफूहरु नरहेको बताएका छन् ।
‘एमसीसी नेपालमा धेरै विवादित भएको छ । हामी सहमति गरेर जानुपर्छ, उनले अगाडि भने, म त अन्तिम समयसम्म परिमार्जन र संशोधनकै कोसिसमा हुनेछु । ‘मैले फिर्ता पठाउँछु भनेको छैन, संशोधन गर्नुपर्छ भनेको हो । प्रचण्डले एमसीसीबारे अझै पनि राष्ट्रिय सहमतिको कोसिस भइरहेको बताएका छन् । अझै पनि प्रधानमन्त्री शेरबहादुर देउवासँग आफू छलफलमै रहेको पनि दाहालले बताएका छन् । ‘राष्ट्रिय सहमतिको कोसिस भइरहेको छ । तर एमसीसी रहेको भनिएको इन्डो प्यासिफिक सैन्य रणनीति अन्तर्गत श्रीलंका र नेपाललाई नयाँ सदस्य भनेर राखियो, उनले भने, ‘यसलाई लिएर म सबैभन्दा अहिले चिन्तित छु । उपलब्धीहरु धरापमा परेकी भन्ने लाग्न थालेको छ।’
‘म अमेरिकासँग राम्रो सम्बन्ध होस् भन्न चाहन्छु । प्रधानमन्त्री तुरुन्तै गरौँ भन्ने पक्षमा हुनुहुन्थ्यो । अलिक लचिलो भाषासहित हामीले असोजमा चिठी लेखेका हौँ, उनले भने, ‘त्यही चिठीका कारण ममाथि अहिले चौतर्फी आक्रमण भइरहेको छ । हिजो पनि टाउकोको मूल्य तोकेकै हो, हिजो मैले सबै यो व्यहोरेकै छु । तर मैले एमसीसीबारे जर्वजस्ती गरेमा देशमा गम्भीर असर पर्छ भनेको हो ।
उनले एमसीसी पास नगरे नेपालले मूल्य चुकाउनुपर्ने भाषासहितको धम्की आएको पनि बताए। उनले अमेरिकाले सुपर पावरका रुपमा नेपालमाथि धम्कीको भाषा प्रयोग गरेको पनि बताए ।
‘हामीले सहमति बनाउनका लागि समय चाहिन्छ भनिरहेका छौँ। सकारात्मक रुपमा नै निष्कर्षमा लग्छौँ भनेका हौँ। तर अनुमोदन भएन भने मूल्य चुकाउनुपर्छ भनेर धम्कीको भाषा प्रयोग गर्ने काम भएको छ। यो त राम्रो होइन, उनले भने, ‘दलहरु र समाजमा पनि एकता चाहिएको छ । यसलाई केही संशोधन र परिमार्जन नगरी जबरजस्ती गरियो भने अफ्ठ्यारो अवस्थामा आउँछ ।
दाहालले सहमतिबिना एमसीसी अघि बढाइए गठबन्धन टुट्न सक्ने बताए । ‘सहमति नगरी एमसीसी अघि बढाइए गठबन्धन टुट्न सक्छ । हामीले नैतिक रुपमा सरकार छाड्ने अवस्था आउँछ, उनले भने, ‘यदि सहमति नगरी अघि बढाइएमा हामी एमसीसीको पक्षमा जाँदैनौं। बरु गठबन्धन छाड्छौँ, सरकारबाट बाहिरिन्छौँ।
