धुलिखेल/सुरक्षित आप्रवासन कार्यक्रम (सामी)ले वैदेशिक रोजगारमा जाने र तिनका आश्रित परिवारलाई सहजिकरण गर्दै आएको बताइएको छ । जिल्लाका सञ्चारकर्मीसँगको अर्न्तक्रियाका क्रममा सामी परियोजनाले अहिलेसम्म गरेका कार्यक्रमबारे पत्रकारलाई जानकारी गराइएको थियो।
कार्यक्रम संयोजक बसन्त कुँवरले सुरक्षित बैदेशिक रोजगारीका अवस्था, अवसर, चुनौती र समस्या समाधानका बारेमा सामीले गर्दै आएका काम कारबाहीबारे कार्यपत्र प्रस्तुत गरेका थिए ।
सुरक्षित आप्रवासन (सामी) नेपाल सरकार र स्विस सरकारवीच सञ्चालित कार्यक्रम हो । यो कार्यक्रमले श्रम, रोजगार, सीप, सामाजिक सुरक्षा जस्ता क्षेत्रमा काम गरिरहेको छ । वैदेशिक रोजगारमा गएका घरमा रहेका श्रीमति माथिको सामाजिक बहिस्करण, उनीहरु प्रती हेर्ने दृष्टिमा परिवर्तन ल्याउनुपर्ने कुरामा जोड दिएको छ ।
वैदेशिक रोजगारीका क्षेत्रमा पुगेका व्यक्ति, घर परिवारलाई मनोपरामर्श र विद्यमान यो परिस्थितिलाइ न्युनिकरणका लागि संस्थाको भुमिका महत्त्वपूर्ण रहेको कुरा जनाएको छ । वैदेशिक रोजगारीबाट सृजित समस्या ऋण, ठगि, जेल शोषण, अलपत्र, अंगभंग, पारिवारिक वेमेल, छोडपत्र, विखण्डन, सामाजिक लान्छना, मानसिक तनाव, बालबच्चा र वृद्धहरुको हेरचाहमा समस्या देखिन्छ । साथ साथै वैदेशिक रोजगारिले गरिबी न्युनिकरण, रिमिट्यान्स लगायतका क्षेत्रमा भार समेत थामेको जनाएको छ ।
'स्वदेशमा नै रोजगारी गरौं, वैदेशिक रोजगारीमा जाने नै भए सही सुचना लिएर र सीप सिकेर मात्रै जाऔं' संस्थाको मुल सन्देश रहेको छ ।
वैदेशिक रोजगारमा रहेका कामदार र तिनका परिवार राज्य संयन्त्रबाट संरक्षित तथा गन्तव्य मुलुकमा मर्यादित काम गर्ने वातावरण सिर्जना गर्ने उद्देश्यले कार्यक्रम सञ्चालन गरिएको हो ।
स्वीस सरकार र नेपाल सरकारको सहयोगमा सञ्चालित ३ वर्षे कार्यक्रम काभ्रेका रोशी र भुम्लु गाउँपालिका, मन्डनदेउपुर र धुलिखेल नगरपालिकामा सञ्चालित छ । कार्यक्रमको समायावधि अब ३ महिना बाँकि छ ।
