धुलिखेल । धुलिखेल नगरपालिकामा ३ दलीय गठबन्धनका साझा उम्मेदवारले ग्रामीण भेगमा नगरको आभास दिलाउने साझा प्रतिवध्दता व्यक्त गरेका छन् । देशकै सुन्दर नगर धुलिखेलमा गठबन्धनबाट नेकपा(एकीकृत समाजवादी)वाट मेयरका उम्मेदवार दयासागर श्रेष्ठ र नेपाली कांग्रेसवाट उपमेयरका उम्मेदवार निराजन जंगमले नगरका ग्रामीण क्षेत्रमा विकासको लहर ल्याउने प्रतिवद्धता व्यक्त गरेका छन् ।
आज धुलिखेल–२, रविओपीमा घरदैलो अभियानका क्रममा वडावासीलाई सम्बोधन गर्दै गठबन्धनको साझा नगर प्रमुख उम्मेदवार दयासागर श्रेष्ठले ग्रामीण क्षेत्रका सडक पिच गर्ने, खानेपानीको उचित व्यवस्थ गर्ने, पर्यटकीय संरचना बनाउने, सम्पदा संरक्षण र प्रवद्र्धन गर्ने बताएका छन् । सहज सडक पहुँचबिना समृद्धिको कल्पना गर्न नसकिने नगर प्रमुख उम्मेदवार श्रेष्ठको भनाइ छ ।
मेयर पदका उम्मेदवार श्रेष्ठले– ‘अहिलेसम्म तपाईहरुलाई एमालेको सरकारले उपेक्षा गरिरह्यो । अब सही निर्णय गरी समृद्धि हासिल गर्ने बेला आएको छ भन्नुहुँदै पर्यटन विकासका आवश्यक अल्पकालीन, मध्यमकालीन र दीर्घकालीन योजना बनाई काम गर्ने प्रतिबद्धता व्यक्त गरेका छन् ।
गठबन्धनका साझा उम्मेदवार श्रेष्ठले घरमा शुद्ध खानेपानी, छोराछोरीलाई प्रभावकारी शिक्षा, स्वास्थ्य सेवा उपलब्धता लगायतका विकासका योजना समुदायको आवश्यकता भएको बताउँदै दक्ष जनशक्तिलाई स्थानीयस्तरमा परिचालन गर्नका लागि नगर स्वरोजगार कार्यक्रम सञ्चालन गर्ने, स्थानीय स्रोत साधनको अधिकतम परिचालन गरि रोजगारीका अवसर सिर्जना गर्ने योजना रहेको बताए ।
आफूहरु निर्वाचित भएपछि मानव संसाधन विकाश केन्द्र स्थापना गर्ने, रोजगारीका लागि सहजीकरण, समन्वय, सञ्जालीकरण, नवप्रवर्तन र अनलाईन रोजगार जस्ता बजार सेवा प्रदान गर्न नगरभित्र मानव संसाधन विकाश केन्द्र स्थापना गर्ने बताइयो ।
