काठमाडौं । नेपाली कम्युनिष्ट पार्टीले प्रतिनिधिसभा वा राष्ट्रिय सभामा यसअघि सांसद भइसकेका तथा मन्त्रीको जिम्मेवारी सम्हालिसकेका व्यक्तिहरूलाई यसपटक समानुपातिक तर्फको बन्द सूचीमा समावेश नगर्ने निर्णय गरेको छ।
पार्टी शीर्ष नेतृत्वबीच भएको सहमतिअनुसार यसअघि प्रत्यक्ष वा समानुपातिक निर्वाचनमार्फत निर्वाचित भइसकेका कुनै पनि व्यक्तिलाई समानुपातिक सूचीमा सिफारिस नगर्ने निर्णय गरिएको हो। पार्टीले समानुपातिक प्रणालीमार्फत नयाँ नेतृत्व र नयाँ अनुहारलाई अवसर दिने नीति लिएको बताइएको छ।
समानुपातिक तर्फको बन्द सूची बुझाउने आज अन्तिम दिन रहेको अवस्थामा पार्टीले सबै सूची नयाँ व्यक्तिहरूबाट तयार गरी सम्बन्धित निकायमा पेश गर्ने तयारी गरेको छ। यस निर्णयलाई पार्टीभित्र नेतृत्व हस्तान्तरण र राजनीतिक नविकरणतर्फको कदमका रूपमा हेरिएको छ।
